Oliva dili ilhon isip school supt. sa CH — Tomas

Makonsiderar nga wala nay kapuslanan ang pagpamugos karon ni Cebu City Schools Division Superintendent Leonilo Oliva nga miinsister nga magpabilin sa katungdanan bisan pa man sa direktiba gikan sa Department of Education nga ibalhin kini og destino didto sa Lapulapu.

Kini human gipahibalo ni mayor Tomas Osmeña nga dili na niya ilhon pa si Oliva isip maoy schools division superintendent sa dakbayan gumikan kay ang gitudlong hulip kaniya nga si Lorna Rances maoy hatagan sa tanang komunikasyon og direktiba gikan sa City Hall.

Nasayran sa Banat News nga niadtong milabay'ng semana nagsilbing duha ang milingkod nga superintendent sa dakbayan human sa pag-asumer ni Rances nga kanhi gikan sa dakbayan sa Mandaue ug ang pagpamugos ni Oliva nga magpabilin sa maong posisyon.

Apan matud ni Osmeña kun siya maoy pabut-on gikonsiderar na niya nga wala na sa DepEd dinhi sa dakbayan si Oliva hinungdan nga dili na niya kini hatagan pa og importansya.

Gani una nang gipadayag sa mayor nga nawad-an na siya og respeto ngadto kang Oliva gumikan sa pagpamugos niini nga magpabilin sa maong posisyon dinhi sa dakbayan bisan pa sa direktiba pagpabalhin kaniya gikan gyud ni Education Secretary Jesli Lapuz niadtong petsa 20 sa nilabay'ng bulan sa Disyembre apan gi-kwestyon kini ni Oliva sa katarungan nga usa lang ka Presidential appointtee ang secretary og bugtong si presidente Gloria Arroyo lang ang makarelibo kaniya.

Si Osmeña maoy mirekomendar ngadto kang Sec. Lapuz nga parelibohan si Oliva gumikan sa pagsupak niini sa mga direktiba sa mayor sama sa dili pagkanselar sa mga klase sa mga tinun-an sa publikong tunghaan dinhi sa dakbayan tungod lang sa mga extra curricular activities.