Sinulog contingents para sa Mardi Gras mas daghan karon

Mabulokon ug sadya unya ang Sinulog Grand Mardigras karong umaabot Enero 21, ning tuiga tungod kay gilauman kini nga daghan ang mosalmot nga dili taga dinhi ug gawas niini awtomatik usab nga maka-apil ang mga contingent nga makadaug sa Sinulog sa Kabataan.

Matud pa ni Dolly Del Mar sa Sinulog Foundation nga gikahinabi sa Banat News, tulo ka buok ang nagpalista karon alang sa Free Interpretation ug unom usab ang Sinulog base apan dili pa kini final nga listahan tungod kay sunod semana pa man ang ilang deadline alang sa gustong moapil sa maong Sinulog Grand Mardigras.

Ang mga contingent nga misalmot sa Free Interpretation mao ang Brgy. Guadalupe, Talisay ug San Carlos City sa Negros samtang ang sa Sinulog Base misalmot ang Tao-tao Payan Negros Occidental, Coastal Bank, Cebu Carbon Market Development, Camiguin Province, Tangkub, Brgy. Pasil Proper ug Panglao.

"Sa pagkakaron tulo pa ka contingent ang miapil sa Free Interpretation samtang ang Sinulog Base unom kabuok pero modaghan ra usab ni kun duna nay modaug sa Sinulog sa Kabataan kay automatic man sila apil sa parade," matud pa ni Del Mar

Midugang kini nga ang mga contingent sa Sinulog sa Kabataan gikan sa elementary ug Hayskol gani usa ngadto sa lima ka contingent ang pwede makadaug niini ug maoy hinungdan usab nga modaghan ang mga contingent inigka Sinulog Grand Mardigras Parade.