Gipusil patay kay naalaang asset sa mga polis

Nakatug-an pa sa pangalan sa tawong mipusil kaniya ang usa ka gipasanginlang asset sa police una pa kini makabsi sa iyang kinabuhi samtang gidala sa tambalanan kagahapon sa buntag.

Ang gipatay giilang si Felix Entera, 32, residente sa sitio Mahayahay sa dalan A. Lopez sa barangay Labangon ning dakbayan kinsa gidul-itan og pusil samtang naglingkod.

Sa imbestigasyon ni PO2 Buenaventura Ursaiz sa Homicide Section giingong naglingkod ang biktima diha sa gawas sa tindahan sa ilang silingang si Erlinda Mercado dihang kalit nga giduol sa suspek.

Walay daghang pahibalo, gidul-itan niini og pusil ang biktima makadaghang higayon diha sa walang bahin sa nawong, walang bukton ug tuong kilid nga milapos ang bala diha sa walang bahin sa lawas gamit ang wala matinong kalibre sa armas.

Human mahagba ang biktima daling miikyas ang suspek palayo sa lugar.

Ang kapuyo sa biktima nga si Barbara Dicdiquen daling midala kaniya sa Cebu City Medical Center. Diha pa lang sa dalan gibutyag ni Entera kung si kinsa ang mipusil kaniya ug giila niya kining si Siano alyas 'Kirat.'

Apan una pa makaabot sa CCMC si Entera nakabsan na kini sa kinabuhi ug gideklarar nga dead on arrival sa mga mananambal.

Si Ursaiz nagkanayon nga si Kirat notadong drug pusher sa maong lugar ug si Entera gidudahan niining asset sa mga polis apan mismong ang kapuyo sa biktima mitug-an sa kapolisan nga dili asset ang iyang kapuyo.