10 ASEAN leaders motambong gyud

Kompirmado na nga moapil ang napulo ka pangulo sa mga nasud nga sakop sa Association of Southeast Asian Nations ug unom ka dialogue partners atol sa 12th Asean Summit sa Sugbo karong Enero 12 hangtud 15.

Gipahibawo ni Ambassador Marciano Paynor Jr., secretary-general sa National Organizing Committee sa 12th Asean Summit nga magsugod na pagpangabot ang delegasyon karong Enero 11.

Ang ASEAN gilangkuban sa mga nasud sa Brunei, Cambodia, Indonesia, Laos, Malaysia, Myanmar, Philippines, Singapore, Thailand ug Vietnam.

Ang mga lider sa maong mga nasud magsugod sa ilang tigum sa Enero 12.

Human niini makigtagbo sila sa mga lider sa mga dialogue partners nga mao ang mga nasud sa Australia, China, Japan, South Korea, India ug New Zealand.

Labing ulahing nipahibawo sa ilang pagtambong sa kalihukan mao ang presidente sa nasud sa Indonesia nga si Susilo Bambang Yudhoyono ug Chinese Premier Wen Jiabao.

Matud pa ni Paynor nga ang mga ASEAN senior officials ug mga foreign ministers mangabot usab sa Sugbo sa Enero 10 ug 11 alang sa ilang mga pasiunang tigum sa dili pa ang Asean Leaders' Summit.

Subling gipadayag ni Paynor nga wala na silay nakitang dakung babag sa pagpadayun sa Summit human kini gioktaba sa niaging buwan gumikan sa bagyong Seniang.

Apan si Gob. Gwendolyn Garcia nipadayag nga ang pag-oktaba sa Summit gikan niadtong Disyembre 10 hangtud 15 sa niaging tuig nakahatag og higayun sa kagamhanan sa lalawigan sa pagpanindot pa sa Cebu International Convention Center diin ipahigayun ang ubang kalihukan gawas sa Shangri-La Mactan Hotel, Resort and Spa.

Si Garcia nanawagan sa katawhan nga suportahan ang makasaysayanong kalihukan alang sa kalampusan niini.