Gibaharan ni Loot ang mga tulisan

Gibaharan sa hepe sa Cebu Police Provincial Office, Sr. Supt. Vicente Loot, ang mga notadong bugoy ug badlungon sa kalungsuran nga maoy suspek kun may mahitabong pagpanulis sama sa sunod-sunod nga kaso sa dakbayan sa Sugbo.

Matud pa ni Loot nga kini ang ilang gisagop nga pamaagi aron masanta ang tulisan nga gustong molihok sa kalungsuran.

Buot ni Loot nga ang mga badlungon sa kalungsuran ang mag-amping usab ug magbantay sa mga taga laing lugar nga makasulod sa ilang teritoryo.

Gimandoan na ni Loot ang tanang police stations nga ubos sa CPPO nga mohimo og accounting sa tanang bugoy ug badlungon sa tagsatagsa nila ka hurisdiksiyon.

Sa pagkakaron, walay dagkung grupo sa mga tulisan nga nagbase sa kalungsuran.

Matud pa ni Loot nga kun duna pay nakabase sa kalungsuran, hayan daghan nang kaso sa pagpanulis ang nahitabo ug makatago dayun ang mga tulisan.

Suma pa ni Loot nga base sa kasinatian, daghan nang kaso sa pagpanulis sa kalungsuran diin dali ra usab dayun madakpan ang mga responsabli gumikan kay layo pa og daganan aron makatago.

Gitumbok ni Loot ang mga tulisan nga nakabase sa dakbayan sa Sugbo nga makalihok lang sa mga lungsod ug syudad nga duol ra usab sa ilang base.