Si Mayor Lety Mancio, sa press conference kagahapon, mipahibalo uban sa iyang abogado nga si Atty. Nathaniel Clarus nga pasakaan nila og P10 milyones nga kasong libelo silang Bise Mayor Virgilio Atienza ug mga konsehal nga sila si Delfin Santillan, Emelita Gabito, Randolph Rivera, Ricline Asentista, Isaias Bacolod, Reynaldo Monsanto, Bernabe Compra Jr. ug ang SK Federation President Owen Daruca.
Si Mancio mikuwestiyon sa tayming pagpasaka og kasong kalapasan sa Anti-Graft Law sa siyam ka opisyal sa Madridejos batok niya didto sa Office of the Ombudsman Visayas tungod kay giatol kini nga didto siya sa Hong Kong, samtang ang gikuwestiyon nga transaksiyon niadto pang 2005.
Gihulagway ni Mancio nga pamolitika ang gihimong pagpasaka og kaso batok niya tungod sa nagsingabot nga eleksiyon, samtang ang siyam ka opisyal pinanguluhan ni Atienza mibulag na sa ilang partido.
Sumala pa ni Mancio nga iapil usab niya og kiha ang duha ka announcer sa Bantay Radyo, diin usa niini si Gabito, usa sa mga konsehal sa Madridejos nga mibulag sa iyang grupo ug mikiha niya sa Ombudsman.
Gihimakak ni Mancio ang akusasyon sa siyam ka opisyal nga mitugot siya sa pagpagawas sa pundo nga mikabat og P7,379,963.37 sulod lang sa pito ka bulan gikan sa Pebrero hangtod Agosto 2005.
Si Mancio mipakita sa mga sakop sa media sa report nga gipirmahan ni Esperaza Obatay sa Commission on Audit (COA) nga nagpakita nga ang kantidad sa pundo nga gihisgutan sa mga miyembro sa sanggunian sa Madridejos gigasto sa nagkadaiyang proyekto nga gisertipikahan na sa COA nga siyento porsiyentong natiwas na sa pagpatuman.
Sa laing bahin, si Mancio mikonpirmar usab nga aduna gyuy presensiya sa mga armadong "goons" sa iyang lungsod, sukwahi sa manifesto nga giluwatan sa mga sakop sa sanggunian nga naghulagway'ng walay mga armadong mga tawo nga naglaroylaroy sa lungsod.
"Kinsay gidepensahan nila? Ngano masakit man ilang buot nga dunay military (sa Madridejos)?" si Mancio nangutana tungod sa pagduda nga may gidepensahan si Atienza ug mga konsehal nga grupo nga maoy nagbuhi sa mga armadong goons sa Madridejos.
Unom ka excerpt sa police blotter ang gipresentar ni Mancio nga nagmatuod nga adunay mga dumadapig niya ug mga residente sa Madridejos nga gihasi og mga armadong tawo, sa wala pa padad-i og mga sakop sa Special Reaction Unit gikan sa Cebu Provincial Police Office niadtong Disyembre 22 hangtod sa 27.