Nanglabay'g pabuto ikiha

Gipasakaan kagahapon og duha ka kaso ang usa ka 27 anyos nga lalaki kinsa nadakpan sa polis sa Liloan tungod sa pagpataka niini og labay og mga paboto atol sa pagsugat sa bag-ong tuig.

Si Robert Albaracin Maglasang, taga Bakante, Tayud sa maong lungsod kinsa nasikop ni PO2 Ritchelle Ayuda ang mag-atubang sa kasong alarm scandal ug disobedience.

Si PO3 Marcelino Servilla, polis sa Liloan, nagkanayon sa pakighinabi niini sa Banat News nga si PO2 Ayuda, SPO3 Carlos Flores uban ni Ramon Guc-ong, barangay tanod sa maong lugar ang mipahigayon og patrolya.

Matud pa ni PO3 Servilla nga daghang nagpaboto sa Suba Poblacion nga naagian sa grupo ni PO2 Ayuda.

Uban sa maong mga nagpaboto mihunong dihang gibadlong kini nila ni PO2 Ayuda.

Apan si Maglasang wala gayod maminaw sanglit nagpadayon kini sa pagpanglabay sa paboto ngadto sa karsda ug naigo niini si PO2 Ayuda.

Si PO3 Servilla midugang nga mikisikisi si Maglasang dihang gigunitan kini ni PO2 Ayuda tungod kay dili unta kini magpadakop hinungdan nga nahitabo ang linayogay.

Si Maglasang nagtingkagol karon sa Liloan police detention cell.