Enero 2-7 dili extension sa registration

Ang gihatag nga lugway sa Commission on Election nga Enero 2 ngadto 7, 2007, dili usa ka "extension" sa rehistrasyon sa mga bag-ong botante kun dili pagpanguha nag hulagway, finger print ug pirma sa mga narehistro na, niadtong Disyembre 31, 2006.

Gipasabot ni Atty. Lionel Castillano, Comelec officer sa Cebu City South District, nga ang tanang miadto sa iyang buhatan hangtod sa alas 5:00 sa hapon niadtong December 31, iyang gipa-fill up og registration form.

Ang tanan mikabat og 1,361 kinsa igo lang naka-fill up og porma apan wala kaku-hai'g hulagway tungod kay usa ra ka "data capturing machine" ang anaa kanila, matud pa ni Castillano.

Hinuon matud niya, pagka-Enero 2, 2007 mikapin sa 300 ang mga mibalik ug nagpakuhag hulagway, busa dakog pagtuo si Castillano nga sa wa pay Enero 7, makuhaag hulagway ang tanan.

Ingon usab niini ang gihimo sa ubang mga buhatan sa Comelec dinhi sa Sugbo, matud pa niya.

Gisubay ni Castillano nga wala pay piniliay niadtong 2004, ang Cebu gihan-okan sa 10 ka mga data capturing machine tungod kay gihimo kining pilot area sa paggamit og modernong ekipo sa pagrehistro sa mga botante.

Apan human sa maong "voters' validation" gibahinbahin ang maong mga ekipo ngadto sa Bohol, Negros Oriental, ug Siquijor, hinungdan nga tagsa na lang ang nahibilin dinhi sa Cebu south ug north district, matud pa ni Castillano.

Matud pa niya nga bisan giunsa nilag hangyo ang ilang ulohang buhatan sa Manila, wa na gyud kini ika-boga kay way kuwarta, miingon si Castillano.

Busa ang gihimo ni Comelec Regional Director Manuel Advincula ug Provincial Election Registrar Edwin O. Cadungog mao na lang ang paghimo kutob sa ilang maabot, matud pa ni Castillano.