Oliva wa'y mapaabot kooperasyon sa CH

Walay mapaabot nga kooperasyon gikan sa kagamhanan sa siyudad sa Sugbo si Dr. Leonilo Oliva kun mo-insister nga magpabilin kini isip Schools division superintendent sa dakbayan.

Giluwatan kining maong pahimangno ni Mayor Tomas Osmeña human pabiling nagmagahi si Oliva pagpahawa sa maong posisyon bisan pa sa giluwatang direktiba ni Education Secretary Jesli Lapuz niadtong petsa 20 sa milabay'ng bulan sa Disyembre nga nagmando kaniya pagbakanti sa maong posisyon ug adto ibalhin og destino sa Lapu-Lapu.

Si Oliva inay nga mopahawa, miinsister nga magpabilin sa mao niining posisyon ug gikwestyon niini ang legalidad sa katungod ni Lapuz nga makaparelibo og opisyal sa DepEd gumikan kay usa lang kini ka presidential appointtee hinungdan nga bugtong si Presidente Gloria Arroyo lang maoy adunay katungod nga mohingilin kaniya sa posisyon.

Tungod niini, gihulagway ni Osmeña nga misamot ang iyang kadasig nga papahawaon gyud si Oliva sa maong posisyon human nakita niini nga walay batasan ang maong opisyal tungod kay bisan ang labaw niini sa DepEd dili na tumanon.