Asean Summit way seguro i-holiday

Wala pay kasiguroan nga madeklarar nga holiday atol sa upat ka adlaw nga pagpahigayun sa na-postpone nga Asean Summit karong Enero 10 ngadto sa 15.

Hinuon gipahibalo ni City Information Officer Nagiel Bañacia kinsa trask force head sa Asean Summit dinhi sa dakbayan nga mahibaw-an karong adlawa atol sa meeting nila sa National Organizing Committee kun ideklarar ba nga holiday ang mga adlaw atol sa summit.

Si Mayor Tomas Osmeña sa iyang bahin mipadayag nga wala na siyay interes nga mohangyo pa og balik ngadto ni Presidente Gloria Arroyo nga ipadeklarar nga holiday atol sa maong kalihukan.

Kini tungod kay alang sa mayor nga mahulog na lang unya nga walay kapuslanan kun iya kining himuon ilabi na kay duol na kaayo ang maong petsa ug alanganin na ang mga Sugboanon pagplano nga mobakasyon ngadto sa lainlaing probinsya.

Nasayran nga si Osmeña una nang mihangyo kaniadto ni Presidente Arroyo nga ipadeklarar nga holiday ang Asean Summit sa wala pa gi-postpone ang orihinal nga schedule niini niadtong Disyembre 11 hangtod sa 14 sa milabay'ng bulan sa Disyembre apan nasagmuyo kini dihang gibakwi sa Malacañang ang nahaunang desisyon sa holiday tungod sa gipangayong exemption sa mga negosyante dinhi sa Sugbo.

Karong bag-o gipadayag ni Osmeña nga mas palabihon pa niya nga magpabiling regular ang klase sa mga tinun-an kay sa ma-postpone kini tungod lang sa Asean Summit.

Si Osmeña dili na kaayo interesado nga mosalmot sa gihimo karong pagpangandam sa Asean Summit tungod sa nag-usab-usab nga desisyon sa gobyerno sama sa pag-postpone ning maong kalihukan nga gitakda unta niadtong milabay'ng bulan gumikan lang sa bagyong Seniang.