Utang sa Mandaue mabayran na

Gikauyonan sa konseho sa dakbayan sa Mandaue atol sa ilang gipahigayong session niadtong Martes ang pagbayad sa P379 milyones nga salapi nga giutang sa siyudad sa milabay'ng tuig gikan sa Development Bank of the Philippines (DBP).

Ang maong utang pabayaran sa dakbayan sulod sa kinse ka tuig.

Si Mayor Thadeo "Teddy" Ouano gihatagan og pagtugot sa konseho sa dakbayan para ma-release niining tuiga ang maong salapi para magamit sa pagtiwas og trabaho sa giugmad nga merkado publiko.

Ang maong merkado gisugdan sa pagpabarog sa milabay'ng tuig ug ang phase 1 pa lang niini ang nakompleto tungod sa kakuwang sa pundo.

Kahinumdoman nga mikabat sa P93.8 milyones ang nagahing budget sa pagpaugmad sa phase I sa maong merkado ug ang Rosal Infrastructure Builders maoy contractor niini.

Si Ouano naaghat og pagpangutang sa DBP para mapahuman ang maong proyekto.

Ang siyudad magpabayad og 8.34 nga interest ug dili molapas sa 9.5 porsiyento nga tubo sa salaping giutang hangtud nga maimpas kini sa pagbayad.

Ang nahisgutang proyekto naa mahimutang sa luyong bahin sa Mandaue City Cultural and Sports Complex sa habig sa Mactan Channel sa sitio Tribunal, barangay Centro.