3 pugante nasikop balik; wa i-blotter sa Canduman

Nadakpan na pagbalik ang tulo ka piniriso nga nakapuga sa Canduman Police Station niadtong Disyembre 27 human nakatulog ang mga polis sa maong presinto.

Apan nasayran nga wala gi-blotter sa Canduman Police Station ang hitabo ug sumala pa sa hepe nga si Sr. Insp. Rogelio Cortel nga walay nahitabong pagpuga sa mga piniriso sa iyang presinto.

Wala ma-blotter ang giingon pagpuga sa tulo ka piniriso nga silang Judemar Saplot Patrimonio, 18; lumad nga taga Cagayan de Oro; Bernard Pelayo, 19; taga Bohol ug usa ka Carlo, usa ka minor de edad. Ang tulo pulos gireklamong nangawat.

Nasayran nga si Carlo, kinsa usa na ka sinaligan sa mga polis, maoy mitunol sa yawe sa laing duha ka piniriso samtang nahinanok ang kapolisan.

Ang kapolisan sa Canduman nga gipangulohan ni PO3 Renato Valle maoy nangita sa mga pugante. Gawas kang Valle, lakip sa maapeke mao si PO3 Ronaldo Logroño, PO2 Tirso Plania, PO1 Marvin Fegarido ug PO1 Eunice Hult.

Matud ni National Police Commission 7 Assistant Regional Director Homer Cabaral nga angayan aksiyonan ni Mandaue City Police Director Alexander Adadinas ang pag-imbestigar sa mga nadistenong polis atol sa pagpuga.

Matud ni Cabaral nga gawas sa kasong administratiba, mahimong ikiha og kasong kriminal ang mga polis tungod sa pagpabaya sa trabaho bisan nga nabalik kini sa prisohan niadtong Biyernes sa hapon.

Bisan walay blotter sa maong insidente, gipanghimakak ni Sr. Insp. Cortel nga wala mo-eskapo niadtong Miyerkules sa kaadlawon ang tulo ka piniriso.

Gawas sa pagsulti nga walay nahitabong puga, si Cortel nagdumili na kini paghatag pa og dugang pamahayag.