Gidul-itan og pusil agtang nabuhi

Milagrong naluwas ang usa ka 18 anyos gikan sa kamatayon bisan paman sa igo niini sa bala diha sa iyang agtang tunga-tunga sa iyang duha ka mata human siya pusila sa usa ka batan-on niadtong milabay'ng gabii diha sa sitio Bliss, Alaska-Mambaling.

Samdan nga milandig sa Cebu City Medical Center ang biktimang si John Digo Jaohali,18, taga Puntod, Alaska-Mambaling human siya dul-iti og pusil sa suspek nga giila lang sa ngalan nga Gerson nga taga sitio Kahuyan sa maong barangay.

Sa imbestigasyon ni SPO3 Zenaido Pastorfide ang biktima uban sa iyang igsuong si Janet gikan sa usa ka internet café ug padulong na pauli sa ilang pinuy-anan dihang gisugat sa suspek.

Matud pa sa biktima, gipasanginlan siya sa suspek nga maoy mikuha sa silver necklace niini nga nawagtang pila na ka adlaw ang milabay.

Apan kusganon kining gipanghimakak sa biktima hinungdan nga gikasuko kini sa suspek dayong ti-on og armas diha sa agtang niini ug gikablit, diha naigo sa sentido ang biktima apan nakahimo kini pagdagan palayo sa suspek.

Ang suspek dali usab nga midagan palayo sa dapit ug hangtud ning pagsulat sa balita wala pa madakpi.

Ang biktima gidala sa iyang inahan nga si Celia ug igsuong si Janet sa CCMC alang sa pagpatambal.