Tigpatantong Indian gitulis

Usa ka tigpatantong Indian national ang gitulis sa duha ka mga wala mailhing mga lalaking nagluwan sa usa ka motorsiklo kagahapon sa buntag diha sa Cabangcalan dakbayan sa Mandaue.

Ang biktima giilang si Kumar Vijay, 33, lumad nga taga Punjab, India ug kasamtangang nagpuyo sa U.M. Seno sa dakbayan sa Mandaue kinsa dunay kaubang laing Indian national dihang nahitabo ang pagpanulis.

Ang insidente gitug-an sa biktima diha sa Theft and Robbery Section sa Cebu City Police Office imbes nga sa Canduman police station.

Matud pa ni Vijay, ang kauban niyang Indian national maoy nagmaneho sa motorsiklo samtang siya maoy nag-angkas samtang nagpadulong na og balik sa dakbayan sa Sugbo gikan naningil sa merkado sa Talamban.

Apan diriyot silang madasmag sa motorsiklo dihang laing motorsiklong may sakay nga duha ka wala mailhing mag lalaki nga semi-opaw ang buhok ug tambukon ang lawas kalit nga mitukmod kang Vijay hinungdan nga mihunong ang iyang kaubang nagmaneho sa kahadlok nga madisgrasya.

Apan nakugang nalang sila dihang kalit nga gibabag sa mga suspek ang motor diha sa ilang atubangan ug ang backrider mikanaog dayong deklarar og tulis.

Walay nakitang armas ang duha ka Indian sa maong suspek apan sa kahadlok nga basin armas ang sulod sa bulsa niini ila nalang gihatag ang ilang nakobrang P12,500.

Ang mga suspek daling miikyas palayo sa lugar samtang ang duha milahos sa buhatan sa TRS aron mosumbong.