15-anyos gisulaya'g lugos

Kinse anyos nga dalagita gisuwayan og lugos sa iyang silingan dihang natulog sa iyang lawak niadtong Huwebes sa tungang gabii sa Dapitan, Cordova.

Ang biktima nga si Ana (tinuod nga ngalan gipugngan), residente sa Cordova Cebu.

Samtang ang gipasanginlang misuway og lugos sa biktima mao si Rolando Sumalinog, 36, minyo ug nagpuyo sa Sitio Kasambagan, Dapitan, Cordova.

Matud pa sa kapolisan nga samtang nag-inusara si Ana nga natulog sa iyang lawak nianang pasado alas 11 sa gabii, si Sumalinog giingong miguba sa kisame ug didto miagi aron makasulod sa lawak sa biktima.

Dihang nakasulod na, mipahimulos gilayon ang suspek ug gihinol-hinol ang tibuok lawas sa biktima lakip na ang pribadong parte sa lawas.

Nakamatikod ang biktima dihang buot na untang mopatong si Sumalinog. Gani, gihulga pa kining patyon kun magdumili pagtuman sa iyang gusto.

Apan nakalugnot ang biktima ug misinggit og tabang hinungdan nga ang inahan nga diha sa pikas lawak natulog nakadungog sa iyang anak ug misusi sa komosyon.

Ang suspek nga nakabantay daling midagan ug misibat palayo sa lugar.

Daling nakapangayog tabang ang inahan ug ang biktima sa ilang mga silingan ug ang mga silingan na maoy nanawag ngadto sa Cordova Police Station nga miresulta sa pagkasikop sa suspek.

"Amo nang gipasaka ganihang buntag ngadto sa piskaliya ang kasong attempted rape in relation to Republic Act 7610 batok ni Sumalinog," si Sr. Insp. Bonifacio Tecson miingon sa dihang nahinabi sa Banat News kagahapon.

Dugang nasayran sa Banat News nga si Sumalinog nakainom og ilimnong makahubog atol sa iyang pagsulod sa lawak sa dalagita.