KBP mipatunga sa away nilang Leo ug Pablo John

Ang Kapisanan ng Brodkaster sa Pilipinas - Cebu misuway pagpatunga sa kasungian sa mga Garcia ug station manager sa DyAB sa ABS-CBN Leo Lastimosa.

Ang mipatawag og tigum tali kang Capitol consultant Pablo John Garcia ug Lastimosa mao si Edward Abad sa ABC-21 kinsa mao usab ang nasubling presidente sa KBP-Cebu.

Tumong sa ilang tigum niadtong Biyernes mao ang pagbalikay sa ilang maayong kabubut-on samtang nagsingabot ang Bag-ong Tuig.

Nabalaka ang KBP nga basin magpersonalay na ang duha.

Apan sa ilang panag-atubang, wala pa gani makabuylo og esplikar si Abad, mitumaw dayon ang panagsungi sa opinyon kalabot sa tinuoray nga isyu ug personalay nga isyu. Gusto masayod si Garcia kun unsay mga isyu nga personalay na ang pagpangatake sa usa ka komentarista.

Apan gipasabot ni Lastimosa nga walay malisya ang iyang pag-atake kang Gobernador Gwendolyn Garcia. Gani dunay mga higayon nga midayeg siya sa gobernadora ilabi na sa iyang proyekto nga "Suroy-Suroy Sugbo".

Tubag ni Garcia nga wala siya mahimuot sa komentaryo ni Lastimosa sa DyAB nga dunay mga sakop sa media nga gibayran ang kapitolyo ingon nga nagsilbing mga "torotot" sa gobernador.

Miulbo si Garcia sa dihang gikuwestiyon ni Lastimosa kun unsay iyang nahimong kalapasan nganong dili siya pasudlon sa Cebu International Convention Center ilabi na sa pag-newscast sa TV Patrol Central Visayas.

Tubag ni Garcia nga salikwaot tan-awon nga sige og panaway si Lastimosa unya adto mag-newscast sa TV Patrol sa CICC.

Wala usab makauyon si Garcia sa mga "side comments" ni Lastimosa sa iyang newscast nga nag-feature kang Ogie Diaz diin mi-adlib si Lastimosa sa tinuod nga batasan sa gobernador.

Alang ni Garcia nga dili angayan mo-side comment si Lastimosa tungod kay igo ra siyang mobasa sa balita ug dili kini usa ka commentary program.

Apan human sa pipila ka minutos nga binayloay sa opinyon, gipalamano ni Abad silang Lastimosa ug Garcia ug miawhag nga mag-ceasefire sila sa personalay nga isyu.

Human sa paglamanohay, usa ka group picture ang gihimo sa mga opisyal sa KBP apil silang Lastimosa ug Garcia.

Bisan walay klarong lagda ug walay klaro kun nag-uliay ba sila sa ilang maayong kabubut-on, si Abad mitataw nga magpabiling gawasnon si Lastimosa sa iyang komentaryo ug hatagan usab og igong panahon sa pagtubag ang mga Garcia.