Nagpusil sa ulo

Usa ka 35 anyos nga dunay nervous breakdown naghikog pinaagi sa pagpusil sa iyang ulo sa miaging gabii sa Sitio Laray I, Buanoy Balamban.

Ang naghikog ug namatay mao si Maximo Padere, ulitawo nga residente sa maong lugar.

Matud sa kapolisan nga si Padere duha na ka buwan nga nag-antos sa iyang nervous breakdown.

Si Padere nagpusil gamit ang 357 kalibre nga rebolber tumong sa tuong bahin sa iyang ulo ug nilapos ang bala sa pikas bahin nga maoy gikamatyan niya dihadiha.

Ang kapolisan pinangulohan ni PO2 Julius Obañana ug mga kauban daling miresponde ug ilang naabtan si Padere nga nagbuy-od na sa yuta.

Sa gihimong imbestigasyon ni PO2 Obañana, nasayran nga sa wala pa mahitabo ang paghikog ni Padere, nabantayan na kining nagbitbit og armas sa iyang iyaan nga si Lorena Pormento.

Buot unta badlongon sa iyaan kay nabalaka nga mag-amok si Padere kay nagpaso-paso sa ilang nataran nga may gigunitang armas.

Ang uyoan nga si Willy Pormento nagkisikisi nga mibadlong human niya makita si Padere nga moaksyon og tion sa sumbohan ngadto sa iyang ulo apan gikablit gyud ni Padere ang gatilyo sa armas ug dihadiha nahagba kini sa duol sa koral sa iyang silingan.

Nakuha sa kapolisan sa crime scene, ang gigamit nga 357 nga rebolber, usa ka buhing bala nga nag-ungot sa tambor ug usa ka empty shell.

"Segun sa estorya didto sa crime scene nahibulong ang mga iyaan ug uyoan diin og armas, wala man ni armas kadto rang higayona nga nakit-an nila nga dihay armas gidala. Hapit na duha ka buwan nag-antos sa iyang nervous breakdown pero suol-suol man," matud ni PO2 Julius Obañana sa Balamban Police nga nahinabi sa Banat News kagahapon.