Oliva mopilit

Padayong nagmagahi si Cebu City Schools Division Superintendent Leonilo Oliva pagbiya sa gihuptan niining posisyon bisan pa man sa giluwatang direktiba ni Education Secretary Jesli Lapuz nga nagbalhin og destino kang Oliva ngadto sa siyudad sa Lapulapu.

Kagahapong adlawa nahinabi sa Banat News si Oliva dihang naabtan kini nga dunay giasikaso diha sa Cebu City Hall ug miingon nga wala kini plano nga mopahawa sa pagka Cebu City Schools Division Superintendent. Gani gipadayag niini nga wala siya ma-apektohi ning tanang mga isyu batok kaniya.

"Let them do what they want",dugang asoy ni Oliva.

Human sa maong pagluwat og pamahayag nagdumili na pagtubag si Oliva sa uban pang mga pangutana.

Nasayran nga si DepEd-7 Regional Director Carolino Mordeno mipasidaan ngadto kang Oliva nga mapugos siya pagpahamtang og silot niini kun padayong magmagahi pagtuman sa direktiba ni Lapuz nga giluwatan niadtong Disyembre 20.

Kasaligang tinubdan mitug-an sa Banat News gikan sa buhatan sa DepEd nga si Oliva padayon na karong nag-asikaso sa iyang clearance alang sa iyang pagbalhin ngadto sa Lapulapu sa susama gihapong posisyon.

Si Lorna Rances, ang City Schools Division Superintendent maoy mohulip kang Oliva ug samtang si Serina Uy sa Lapulapu maoy mohulip sa Mandaue.

Ang pagparelibo kang Oliva naggumikan sa rekomendasyon ni Mayor Tomas Osmeña nga nasuko kaniya tungod sa kapakyas niini pagsunod sa iyang kagustuhan nga dili kansilahon ang mga klase sa mga publikong tunghaan tungod lang sa mga extra-curricular activities.