Manager nangihi 'dasmagan motor

Usa ka plant manager sa rattan furniture naangol ug nalandig sa tambalanan human nadasmagan og motorsikolo samtang nangihi kilid sa iyang gimanehong sakyanan niadtong Miyerkules sa hapon sa Lamintak Norte, Medillen.

Ang biktima mao si Ernesto Albonte, 42, minyo nga taga Labangon ning dakbayan, plant manager sa Tradewind Rattan Furniture nga nagbase sa Taboc, Mandaue City.

Samtang ang nakadasmag ug naangol human malagpot sa iyang motorsiklo nga Honda Wave may plaka IJ 9023 mao si Moreno Villegas, 46, minyo residente sa Lamintak Sur, Medillen

Sa imbestigasyon ni SPO1 Allan Tan sa Medillen nasayran nga ang biktima mihunong ug nanaog sa gimanehong jiffy sa may kurbadahon nga bahin sa nahitaboan aron mangihi.

Apan si Villegas gikatahong kusog ang dagan apan giingong nawad-an og kontrol pag-abot sa kurbadahon hinungdan nga maayong pagkaigo sa biktima.

Matud pa sa kapolisan ang biktima gikatahong nabalian sa tiil human maigo sa motorsiklo ug si Villegas nakaangkon og samad sa kalawasan.

Si Albonte anaa karon sa pribadong tambalanan samtang si Villegas sa Vicente Sotto Memorial Medical Center.