Codilla gipanalipdan ni Tomas

Gipanalipdan ni Mayor Tomas Osmeña si Cebu City Fire Marshal Supt. Ismael Codilla gikan sa mga pasangil nga duna kini pagpabaya nga nahimo hinungdan nga nakadako ang sunog nga miugdaw sa unom ka mga buhatan sa Kapitolyo niadtong miaging adlaw.

Atol sa press conference kagahapon sa udto gibutyag ni Osmeña nga wala na kinahanglana nga mohimo siya og linaing imbestigasyon alang sa maong alegasyon gumikan kay misalig siya sa katakus ni Codilla ug masaligon sab siya nga makadepensa sa maong mga pasangil ang fire marshal.

Gani walay lipud-lipod nga gipadayag sa mayor nga kun siya maoy pabut-on, pilion niya ang Cebu City Fire Department isip most performing agency gumikan sa pagdumala ni Codilla.

Sa susamang kalambuan, dili manginlabot ang konseho sa dakbayan kun adunay imbestigasyon batok ni Codilla hangtod dili sila makadawat og pormal nga reklamo, matud pa ni Konsehal Augustus Pe Jr.

Ang buot ipasabot sa mayor nga iyang kuhaon ang tanang mga ayuda nga gihatag sa siyudad ngadto sa kabomberohan kun butangan og laing fire marshal nga wala siya makahibalo sa katakus niini.

Ang siyudad sa Sugbo naghatagan og tagsa ka libo nga incentive matag bulan sa mga sakop sa kabomberohan dinhi sa dakbayan ingon man gasoline allocation sa ilang mga sakyanan og uban pa apil na ang mga sakyanan.

Nasayran nga gibasol ni Comar si Codilla tungod sa sayong pagbiya niini sa fire scene ug giahat ug deklarar nga undercontrol hinungdan nga mitumaw og balik ug nakadako ang sunog sa unom ka mga buhatan sa kapitolyo niadtong Lunes sa kaadlawon nga mitala sa P15 milyones nga danyos.