Babaye gilabnihan, gihapak sa puluan

Usa ka babaye gilabnihan og shoulder bag nga gisudlan og dakong kantidad sa salapi ug mga alahas sa tulo ka lalaki nga nagsakay og motorsiklo. Ang usa kanila namunal pa gyud sa ulo sa biktima gamit ang puan sa armas apan usa sa mga suspetsado nasikop hinuon.

Nahitabo ang pagpanulis sa miaging gabii sa kasaulogan sa Pasko nga nahitabo sa dalan Juana Osmeña Extention sa dakbayan sa Sugbo.

Si SPO1 Vicente Espenido Jr sa Presinto 2 sa Fuente Police Station nga gikahinabi sa Banat News miila sa dinakpan nga mao si Felipe Auria Francisco.

Ang suspetsado nga si Francisco maoy usa sa gitumbok nga naglabni sa shoulder bag ni Esmerlinda Batista nga gisudlan sa P20,000 nga salapi, kuwintas, bracelet nga bulawan, cellphone ug uban pa.

Dugang pa ni SPO1 Espenido nga kuyog sa suspetsado ang duha pa niini ka mga kaubang lalaki nga nagsakay og motorsiklo ug ang biktima nga ilang nalabyan sa maong dapit ang kalit lang gilabnihan.

Nagdumili sa paghatag ang biktima pinaagi sa paghugot og gunit niini ug ang suspetsado nga nasuko nga nagdumuli paghatag ,dali kining nakaibot sa armas ug gibunalan ang ulo ni Batista sa puan sa armas.

Si PO1 Julius Aniñon sa Mobile Patrol Group nga nakalabay sa maong dapit dali nga misikop ni Francisco ug gitugyan sa Fuente Police Station ug ang biktima dali usab nga gidala sa tambalanan.