Mga biktima sa Unitop fire tabangan

Kagamhanan sa Ormoc ug tag-iya sa tindahan nga nasunog nagkasabot nga maoy moabaga sa mga galastuhan sa mga na- ospital human naangol ug sa pagpalubong sa mga namatay sa sunog sa Unitop General Mechandise.

Base sa taho nga ang mga paryente sa mga naangol ug namatay sa insidente hatagan og tag P50 mil nga salaping hinabang.

Si Mayor Eric Codilla nagkanayon nga kasagaran sa mga biktima nasayop sa pagtuo nga naggikan sa gawas sa building ang buto nga maoy hinungdan misulod sila sa building aron motago apan nangatanggong hinuon sa sulod sa tindahan atol sa pag-ulbo sa sunog.

Sa susamang kalamboan, naila na sa mga otoridad ang 24 ka patay'ng lawas nga napaig sa nahitabong sunog sa Unitop niadtong Martes sa dakbayan sa Ormoc.

Base sa taho sa ABS-CBN nga ang maong mga patay'ng lawas giila sa forensic investigator sa Tacloban City Police Crime Laboratory niadtong Martes sa gabii.

Ang mga lawas giila pinaagi sa pagtandi sa resulta sa forensic ug sa mga kasayuran nga gihatag sa mga paryente sa mga biktima.

Ang mga otoridad mihunong na sa pagpangita og dugang mga patay'ng lawas sulod sa nasunog nga tindahan.

Niadtong Martes sa gabii, gikompirmar sa mga otoridad nga 24 ka tawo ang namatay sa sunog lakip na niini ang usa ka mabdos.

Ang mga patay'ng lawas gidala V. Rama Funeral Homes apan ang uban niini gidala sa ilang mga paryente sa balay.

Ang kabomberuhan sa lugar mibutyag nga ang mga napaig nga biktima nabangalan diha sa pansayan sa tindahan.

Gikataho nga ang sunog nagsugod mga alas 4:40 sa hapon, diin nagsugod kini sa usa ka stall sa pabuto nga nahimutang sa entrance sa tindahan.

Ang "tracer bullet" sa pusil-pusil nga duwaan sa usa ka bata ang giingong mitugpa ngadto sa baligyang pabuto.

Ang kalayo dali kaayong mikuyanap sa pultahan hinungdan nga ang mga nag-shopping mipaingon sa fire exit apan demalas tungod kay gi-locked kini .