Pabrika's pabuto miulbo; 2 naangol

Duha ang naangol sa sunog nga nahitabo gumikan sa pabuto sa pabrika sa pabuto sa Sitio Radar, Babag, Lapu-Lapu sa milabay'ng gabii.

Ang nasunog mao ang panimalay ni Ansel Ymbong, 40, minyo ug lumad sa maong dapit nanag-iya og pabrika sa pabuto, samtang ang naangol mao sila si Ricardo Ymbong ug Josel Ducay mga trabahador ni Ansel nga nagpuyo usab sa maong dapit.

Base sa imbestigasyon ni FO1 Climaco Salisid sa Babag Fire Substation, nga usa kanila ni Ymbong ug Ducay ang miputol sa pabilo ug sa dihang mi-spark kini, dali kaayo nga mikatap padulong sa panimalay ni Ymbong hinungdan sa pag-ulbo sa kalayo.

Dali usab nga naugdaw ang payag ni Ansel diin didto gipahimutang ang tanang mga materyales ug mga finish products nga pabuto.

Gumikan sa kahadlok nga sikopon si Ricardo ug Dugay sa kapolisan, midali og pahilayo sa maong dapit bisan pa sa ilang nahiaguman nga paso sa ilang kalawasan.

Gibana-bana ni SPO1 Jumed Alburo nga mikabat sa P8 mil ang danyos sa maong sunog diin nadawat sa kabomberohan ang alarma 6:11 sa milabay'ng gabii diin gipaubos sa 1st alarm ug nakontrolar kini sulod sa 3 minutos.

Matud pa ni SFO1 Alburo nga si Ansel Ymbong konpirmado nga sub-scontractor ni Mario Avila nga maoy gihatagan og permit sa paggama og pabuto gikan sa Firearms and Explosives Service Group.