Nadugtang babaye napalgan sa dumpsite

Usa ka wala mailhing babaye ang napalgang nagsugod na og kadugta diha sa tambakan sa basura sa landfill sa Whiteroad, Inayawan ning dakbayan niadtong milabay'ng hapon.

Ang maong babaye gibana-banang nagpangidaron og 40 ngadto sa 50 anyos ug nagsuot og buwakon nga duster ug kolor green nga short pants.

Usa ka Hendrick Orbiso,47, usa ka bulldozer operator ug residente sa maong dapit mitug-an sa Homicide Section nga walay nakaila sa biktima diha sa ilang lugar.

Usa ka babayeng naagi sa maong dapit nga si Pamposa Siasol maoy nakakita sa patay'ng lawas sa babaye ug mao na usab ang mipahibalo kang Orbiso.

Walay nakit-ang timailhang gidagmalan ang biktima sanglit walay nakit-ang samad diha sa lawas niini apan gitakdang ipailawom sa kapolisan ang patay'ng lawas sa biktima sa awtopsiya.