Tulisan di gusto tseke daling nangikyas

Pakyas ang duha ka gidudahang tulisan human misuway og tulis sa usa ka lending firm diha sa dalan MC Briones, Subangdaku dakbayan sa Mandaue sa milabay'ng adlaw. Kini dihang ilang nasayran nga walay cash ang maong establisamento og pulos ra tseke.

Ang gisuwayan og tulis mao ang Sto.Niño de Cebu Finance Corporation nga girepresentahan ang ilang tagdumalang si Marian Navarro Estrella.

Sa imbestigasyon ang kapolisan sa station 2 sa Mandaue City Police Office nasayran nga usa sa tulisan ang misulod sa maong lending firm ug miduol kang Mariluo Gigi Cabahug ang processing in-charge.

Nagtuo si Cabahug nga ilang kustomer ang maong lalaki ug iya kining giatiman apan kalit lang nga mibunot og wala matinong kalibre sa armas ang maong tawo dayong deklarar og tulis.

Si Cabahug bisan sa kahadlok mitubag ngadto sa tulisan nga wala silay cash kundili pulos lang mga tseke, gumikan niini kalit nga milakaw ang tulisan luwan kini sa usa ka pulang motor nga daan nang naghuwat kaniya sa gawas sa maong edipisyo.

Matud pa ni P/Sr.Insp. Edilberto Castañeda hepe sa Station 2 posibleng mga bag-ong tubo ang maong mga tulisan gumikan kay dali kining napatuo nga walay kwarta ang maong establisamento dayong sibat ngadto padulong sa amihanang bahin sa dakbayan.

Si P/Sr. Supt. Alexander Abadinas nga miresponde usab sa maong alarma miingon nga usa sa nakit-ang lapso sa maong kumpanya, mao nga wala kini gwardiya, walay security camera ug alarm hinungdan nga dali kining nasudlan sa maong mga tulisan.

Swerte nalang nga way nakuha ang maong mga tulisan, bisan ang mga sakop sa Cebu City Police Office naalarma usab sa maong insidente ug daling mipahigayon og roadblock sa mga agianan nga posibleng lutsan sa duha apan wala gihapon masikop ang mga suspek.