TRS sa CCPO way Christmas break

Walay Christmas ug New Year's break nga gitugot ngadto sa mga sakop sa Theft and Robbery Section tungod sa kabalaka sa pagsiaw unya sa mga pagpanulis ug pagngawat atol ning kapaskuhan.

Si Senior Inspector Alexis Relado, hepe sa TRS mitug-an sa Banat News nga gumikan sa kadaghan sa mga tawo ug mga mibakasyon ug mga kalihukan dinhi sa Sugbo atol ning Kapaskuhan mas angayan karong mahimong alerto ang kapolisan.

"Ngayon mas kailangan yung serbisyo natin, konteng sakripisyo lang naman eto eh," asoy pang Relado.

Sa pagkakaron dunay tulo ka reaction team ug usa ka special operations team ang TRS nga mobantay sa Sugbo 24 oras matag adlaw sa tibuok semana.

Ang TRS mipakatap na usab og mga Barangay Intelligence Network sa mga dapit diin dunay sagad nga hitabo sa pagpanulis dinhi sa dakbayan lakip na usab ang mga simbahan.

Sa pagkakaron ang TRS mipatuman na sa direktiba sa PNP sa pag-usab sa ilang kampanya batok sa mga kriminal nga imbes nga magpaabot sa mahitabo, sila na maoy nag-una diha sa kadalanan aron kapugngan kini.

Ang CCPO mihatag og pagtugot sa mga sakop niini nga makabakasyon karong panahuna apan gibahin sa duha ka batches aron di mabakantehan ang lugar nga sagad dunay krimeng mahitabo.

Si Relado nagkanayon nga iya lang gipasabot sa mga sakop nga dyutay lang kini nga sakripisyo ug sagad usab sa iyang mga sakop taga dinhi ra sa dakbayan.

Giplano karon ni Relado nga hangyuon ang direktor sa CCPO sa paghangyo nga ang ubang gasolina nga gitagana sa mga police station nga idonar diha sa TRS aron kanunay na ang pagpatrolya diha sa kadalanan.