Gisabliga'g asido sa fratman

Nasunog ang nawong sa usa ka 22-anyos nga lalaki human kini sabligi og asido sa giingong sakop sa fraternity niadtong Biyernes sa gabii diha sulod sa usa ka dakong tindahan sa dakbayan sa Talisay.

Ang biktima giila sa mga polis sa siyudad nga si Michael Cui taga Sitio Riles, Barangay Cambuntan lungsod sa Carcar kinsa daling mihatod sa iyang kaugalingon diha sa Talisay District Hospital para magpatambal .

Ang mga suspetsado duha ka wala mailhing lalaki kinsa daling miikyas human sa hitabo.

Si PO1 Achilles Alisen polis sa siyudad kinsa maoy miresponde sa hitabo nagkanayon kagahapon sa Banat News nga posibleng sakop sa fraternity ang mga suspetsado og gipareglahan lang nila si Cui.

Base sa imbestigasyon ni Alisen nga si Cui diha sa sulod sa maong tindahan nagduwa og computer games.

Si Cui giduol sa usa ka batan-ong lalaki og gipasidan-an nga dili pagawson sa tindahan para walay dautang mahitabo kaniya.

Wala mogawas sa tindahan si Cui og padayon kining nagduwa og computer games apan giduol kini sa usa sa mga suspetsado og sa walay igong rason gisukmag kini.

Ang kuyog sa unang suspetsado miduol usab og gibunlot ang buhok ni Cui dayon sablig sa asido.

Sa milabay'ng semana usa usab ka drayber sa PUJ diha sa Tabunok ang nakaangkon og pahak sa iyang buko-buko og mga paso sa lawas human usab kini sabligi og asido sa iyang kalalis.