Negosyante 'mipalusot' og kahoy gidakop

Usa ka negosyante ang gisikop sa kapolisan human misuway og palusot og kahoy nga molave nga walay permit sa miaging pasado alas 9:30 sa gabii didto sa Sitio Guilungsuran, Poblacion Ginatilan Cebu.

Segun sa report sa kapolisan nga nakadawat sila og taho gikan sa usa ka concerned citizen bahin sa maong ilegal nga kargamento.

Ang hepe nga si P/Insp. Daniel Comision sa Ginatilan mimando gilayon sa iyang mga sakop sa pagsusi sa nadawat nga report gipangulohan ni PO1 Renedo Villaraiz nga miresulta sa pagkasikop ni Leonardo Misal, 38, minyo kanhi barangay kagawad sa Bato Badian ug nagpuyo sa maong lugar.

Gidakop og apil ang iyang driver kinsa nagmaneho sa Suzuki Jipney GCM 141 mao si Edizon Vildosola 42, minyo, nagpuyo sa Sangi, Alegria.

Nakuha nga ebidensya sa kapolisan mao ang 26 kabuok nga kahoy nga mosumada sa 135 board feet.

Si Misal dihang gipangayoan og mga papeles ni PO1 Villaraiz apan ang naulahi napakyas kini ug walay napakita hinungdan nga gisikop dayon uban ang iyang driver.

Sa pasiunang imbestigasyon nga gihimo sa kapolisan sa Ginatilan nasayran nga ang maong kahoy gikan sa lungsod sa Badian ug ila kining dad-on sa Ginatilan kinsa dunay mga tawo nga mopalit sa maong kahoy.

Ang duha ka dinakpan kasamtangan gibalhog sa prisohan samtang gihikay pa sa kapolisan ang tukmang kaso nga ipasaka batok kanila.