Mahuyang napusilan

Usa ka 19-anyos nga mahuyang ang napusilan sa usa ka wala mailhing tulisan human kini nagdumili sa paghatag sa iyang cellphone kagahapon sa kaadlawon diha sa Sitio Nonoc, Barangay Tabunok dakbayan sa Talisay.

Ang biktima mao si Reynald Reveral residente sa Barangay Basak Cabreros niining dakbayan kinsa nakaangkon og samad pinusilan sa iyang tuong bukton daling gidala diha sa Talisay District Hospital.

Ang suspetsado nagsul-ob og kalo ug puwa nga short pants.

Base sa imbestigasyon ni PO1 Achilles Alisen polis sa Talisay nga si Reveral diha sa usa ka kan-anan sa lugar nag-inom.

Migawas si Reveral para mosoka tungod sa sobrang kahubog niini apan kalit kining giduol sa suspetsado og gitionan og pusil ug gimanduan nga ihatag ang iyang nokia 8860 cellphone nga nagkantidad og P15 mil.

Nagdumili sa paghatag si Reveral sa iyang cellphone ngadto sa suspetsado hinungdan nga gipusil kini.

Ang suspetsado daling mibiya sa lugar uban sa laing upat ka wala maihing lalaki human sa maong insidente.