Kawat og kable sa kuryente sa dakbayan sa Talisay padayon

Kawatan og mga kable ug wire miigo na usab sa dakbayan sa Talisay diin niining bag-o lang adunay duha ka biktima ang mitaho sa kapolisan sa siyudad kabahin sa maong insidente.

Si Gamelson Amomonpon, 25-anyos drayber ug security guard sa Philippine Long Distance Telephone (PLDT) mitaho sa kapolisan niadtong Biyernes sa hapon kabahin sa pagkawagtang sa Aerial ESF 30 pairs x 24 gauge x 20 meters nga cable sa telepono nga gikutay diha sa poste sa lugar apan wala mapiho ang kantidad niini.

Ang nahisgutang kable gikuha sa wala mailhing kawatan.

Sa laing bahin, usa ka residente sa sitio Salvador, Barangay Tanke ang mitaho sa kapolisan niadtong Biyernes tungod sa pagkawagtang sa ilang wire sa kuryente nga dunay gitas-on nga 15 metros apan wala usab mapiho ang kantidad niini.

Ang biktima mao si Melanie Sumalinog, 24, nagpuyo sa nahisgtuang lugar.

Giputol sa wala mailhing kawatan ang nahisgutang wire nga nagkonektar sa diha sa balay ni Sumalinog paingon sa poste.

Base sa natala sa talaan sa kapolisan sa siyudad, niining tuiga sobra na sa napulo ka insidente sa kawat sa kable sa telepono ug wire sa kuryente.

Ang mga kawatan arisgado ug walay kahadlok nga mosaka sa mga poste ug moputol sa mga kable ug wire sa kuryente.