Sa usa ka report sa pamantalaang New York Times sa Estados Unidos, ang US commander sa Pasipiko nga si Admiral William Fallon mitug-an nga lakip sa ikanselar mao ang humanitarian aid ug reconstruction programs nga ilang gihatag dinhi.
Matud pa sa maong opisyal nga ibalik lang nila ang maong mga kalihukan kun makasiguro na ang US nga protektado sa kasabutan sa Visiting Forces Agreement ang ilang mga tropa nga mobisita dinhi.
Sa kasabutan sa VFA, ang US maoy dunay katungod nga mokustodiya sa mga sakop niining giakusahang milapas sa balaod sa Pilipinas hangtud nga mahusay na sa korte ang kaso.
Niadtong Lunes, si Foreign Affairs Secretary Alberto Romulo ug si US Ambassador to the Philippines Kirstie Kennedy milagda og kasabutan nga ang kombiktadong si Smith ibalhin ngadto sa US embassy gikan sa Makati City Jail.
Sumala pa sa report nga gimando na ni Fallon ngadto sa mga tropang Amerikano ug mga barko nga mitabang karon sa mga biktima sa bagyo sa Bicol nga pabalikon na sa ilang mga base gawas sa Pilipinas.
Ang Balikatan nga gitakda untang magsugod na karong sunod bulan nga langkuban sa 4,700 ka mga sundalong Amerikano ug 3,000 ka tropa sa Pilipinas dili na mahinayon, kadto nalang ginagmay nga kalihukan nga maglangkob sa computer simulations ug kadtong mga dili dinagko nga pagbansay-bansay maoy magpadayon kung matapos na ang isyu sa kustodiya kang Smith.
"The last thing we want is to undo all the good work that has been done between the Armed Forces of the Philippines and ourselves, but this puts me in a real dilemma because I need to guarantee the safety of our forces," asoy pang Fallon sa maong report.
Daan ng mipadayag og pagkadismaya ang Washington tungod sa maong desisyon nga adto ibilanggo si Smith sa Makati City Jail nga gihulagway sa mga Amerikanong usa ka paglapas sa VFA.
Si Smith gikumbikto sa korte tungod sa paglugos kang Nicole niadtong Nobiyembre 1 sa milabay'ng tuig diha sa Subic Free Port.