Hired killer konpirmado

Duna gyuy mga hired killers nga nagbase dinhi sa Sugbo base sa intelligence report sa kapolisan.

Si Supt. Pablo Labra, ang hepe sa Criminal Investigation and Intelligence sa Cebu City Police Office mitug-an sa Banat News nga dunay di momenus tulo ka grupo sa mga gidudahang mga gun-for-hire dinhi sa Sugbo apan di sila mahimong dakpon sanglit walay kasong ikapasaka nga naglambigit kanila sa krimen.

Matud pang Labra nga kining maong mga tawo nagbase diha sa bukirang barangay sa dakbayan samtang ang uban diha sa Talisay city nga kanhi mga sakop sa New People's Army.

Wala hinuon ibutyag ni Labra ang mga pangalan sa mga tawo apan sila kanunay'ng gipanid-an sa kapolisan.

Sumala pang Labra nga duna nay mga insidente nga dunay gipasakaan og kaso ang CCPO batok sa mga miyembro niini, usa na ang suspek sa pagpatay sa usa ka retiradong sundalong Amerikano ug miangol sa uyab niini pila na ka bulan ang milabay diha sa Banawa sa Guadalupe.

Matud pang Labra nga kining maong mga tawhana, base sa impormasyong ilang nadawat, modawat og trabaho basta magkauyon lang sa presyo.

"Kita wala tay info nga dunay mga arrival sa maong mga grupo, pero kita dinhi duna na tay mga impormasyon nga duna gyuy grupo sa mga tawong pwedeng motrabaho," asoy pang Labra.

Niadtong milabay'ng adlaw, si PNP director Oscar Calderon mipagawas og direktiba sa tanang ginsakupan sa pagpangita ug pagdakop sa mga gidudahang mga gun-for-hire sa nasud.

Kini tungod sa nagsingabot nga eleksyon diin gikahadlukang posibleng daghang mga kandidato na usab ang patyon niining mga maong grupo bugti sa bayad sa mga higpit nga kaatbang sa politika.

Dinhi sa Sugbo, mga negosyante ug kadtong dunay mga personal nga kaaway lamang ang gidudahang nabiktima sa mga gun-for-hire nga gibayran sa ilang mga kontra.