Secret marshals di ihurot

Pagpatuman sa subling pag-deploy sa mga secret marshal sa mga kadalanan giklaro nga dili ihurot og butang ang mga polis ug dili kini sa tanang oras himuon.

Si Cebu City Police Office acting director Melvin Gayotin mitug-an sa Banat News miklaro nga aron dili mapokus ang kapolisan sa pagbantay sa mga tulisan sa mga PUJ nga makaapketo unya sa uban pang trabaho sa kapolisan, pilion lang ang mga rotang butangan niini ug kung unsang orasa himuon.

Matud pang Gayotin nga ning paagiha di na mabalda ang uban pang anti-criminality campaign sa kapolisan.

Giklaro hinuon ni Gayotin nga bisan paman sa pagpadayag sa duha ka dagkong opisyal sa lokal nga kagamhanan sa dakbayan kabahin sa pagsupak ug pangomentaryo sa maong lakang ila gihapon kini ipadayon.

Kahinumdoman nga si Mayor Tomas Osmeña mipadayag nga di siya pabor sa subling pagpakatap og secret marshals tungod kay masakripisyo ang ubang trabahuonon sa kapolisan, samtang si Bise mayor Micheal Rama mipadayag usab nga di angayang ianunsyo ang maong lakang kung gusto sa kapolisan nga mobunga ang ilang kampanya.

Si Police Regional Office 7 director Silverio Alarcio, Jr. mitug-an nga kabubut-on na sa mga direktor sa kapolisan kung unsaon pagpahigayon sa direktibang iyang gimando.

Matud pang Alarcio ang mga hepe na sa matag unit ang molihok sa taktikang ilang himuon aron pagsunod sa direktiba kini bisan paman nga nabaniog na sa media ang maong plano.

Hinuon wala basula ni Alarcio ang media sa pag-leak sa maong impormasyon sanglit mas gituuhan ni Alarcio na angayang usbon nila ang sistema sa pagpakatap sa ilang mga direktiba sa matag unit tungod kay wa kini nakit-an ni Alarcio diin moguwa ang mga dili angayang ipagawas.

"We should handle our communication next time, we will be reviewing the handling of communications," asoy pang Alarcio.