Lalaki gitusaktusak og kutsilyo sa Alaska, patay

Patay ang usa ka lalaki human kini tusak-tusaka og kutsilyo samtang naglakaw diha sa usa ka dapit sa Puntod, Alaska-Mambaling ning dakbayan kagahapon sa kaadlawon.

Ang namatay giilang si Wenceslao Quijote,35, minyo ug residente sa maong dapit.

Sumala pa sa imbestigasyon sa Homicide Section natino nga ang biktima kasamtangang naglakaw diha sa maong dapit dihang kalit nga giatangan sa wala mailhing lalaki diha sa iyang agianan.

Ang suspek giingong migamit og kutsilyo sa pagdunggab sa biktima makadaghang higayon diha sa nagkadaiyang parte sa lawas niini nga hinungdan sa hinanaling kamatayon sa biktima.

Wala pa matino sa Homicide Section kung unsay motibo sa pagpatay kang Quijote apan si SPO3 Dennis Moga ang imbestigador sa Homicide Section mitug-an sa Banat News nga duna na silay gisubay nga anggulo sa kamatayon ni Quijote.

Nasuta nga walay gikakontra ang biktima diha sa ilang dapit ug daghang mga tawo ang nahibulong nganong gidunggab kini sa ilang lugar.