Pagbalhin ni Oliva gikalipay

Gikalipay dayon ni Mayor Tomas Osmenña ang dilinali-ang aksiyon sa Department of Education pagtaktak kang Cebu City Schools Division Supt. Dr. Leonilo Oliva nga gibalhin na karon og destino didto sa Lapulapu.

Gihulagway ni Osmeña nga mapasalamaton kaayo siya sa gipakitang pagsalig ni DepEd Secretary Jeslie Lapuz nga daling miaksiyon sa iyang giduso nga rekomendasyon pagparelibo kang Oliva sa maong posisyon.

Si Osmeña mirekomendar pagparelibo kang Oliva human iyang namatikdan nga wala kini mosunod sa direktiba nga nagdili sa mga magtutudlo pagkanselar sa mga klase sa mga tinun-an sa publikong tunghaan gumikan lang sa mga extra curricular activities nga maoy gitumbok sa mayor nga naka-apektar sa kalidad sa edukasyon sa mga tinun-an.

Ang DepEd Superintendent sa dakbayan sa Mandaue maoy gikataho nga ihulip kang Oliva dinhi sa dakbayan ug tungod niini nagplano dayon si Osmeña nga makigtagbo siya niini.

Gustong pahimangnuan daan ni Osmeña ang maong opisyal nga mo-concentrate gyud sa pagpalig-on sa edukasyon sa mga tinun-an ug likayan gyud nga makanselar ang mga klase tungod lang sa mga extra curricular activities.

Bisan sa Sinulog mardi gras karong Enero sunod tuig dili buot ang mayor nga dunay mga klase nga makanselar tungod lang sa pag-ensayo sa Sinulog ug gamiton ang mga lawak niini sa mga out of town contingent.

Gihulagway sa mayor nga sa panahon ni Oliva daw gipasagdan niini ang edukasyon sa mga tinun-an gumikan sa pagtugot niini nga makanselar ang mga klase tungod lang sa mga extra-curricular activities.

Matud sa mayor wala siyay laing pilosopiya nga gisagop pagkakaron mao ang pagpatuman og mga kausaban aron mapalambo ang kalidad sa edukasyon sa mga publikong tunghaan dinhi sa dakbayan.