6 ka saksi ni Jojo gigantihan

Pormal nga gidawat sa unom ka mga saksi sa pagtumbok sa mamumuno sa kanhi Bantay Dagat Program Director Elpedio "Jojo" dela Victoria Jr. ang P150 mil nga ganti gikan sa kagamhanan sa siyudad sa Sugbo.

Si Mayor Tomas Osmeña maoy pormal nga mitunol sa tseke nga mikantidad og P150 mil diin bahinon sa tag P25 mil ang maong kantidad sa unom ka mga saksi sa pagpatay kang dela Victoria.

Gipahalipayan sa mayor ang mga saksi nga gitago lang ang mga pangalan alang sa ilang seguridad tungod sa maisogon niining pagtumbok kang SPO1 Marcial Ocampo nga maoy mipusil patay kang dela Victoria didto sa gawas sa pinuy-anan niini sa Talisay atol sa Miyerkules Santo niadtong milabayng bulan sa Marso.

Apan matud sa mayor andam gihapon siya og tagana nga mopagawas og P1 ka milyon ka nga ganti alang niadtong makatumbok sa mastermind sa krimen aron manubag kini sa mga salaod nga iyang nahimo.

Subling gipadayag ni Osmeña ang iyang tinguha sa pagpadayon sa plano niini nga ilisan og pangalan aron himuong Jojo's Point ang Kawit Island sa South Reclamation Project (SRP) aron paghatag og importansya sa siyudad sa mga maayong binuhatan ni dela Victoria.

Ang ka-agresibo ni dela Victoria sa kampanya batok sa mga ilegal nga panagat maoy gituohang numero-unong hinungdan nga gipapatay kini.