Matud pa ni Yapha nga nasayod siya nga ang hatagan og konsiderasyon sa korte kon hisgotan ang epekto sa oil exploration mao ang mga lokal nga mananagat, busa bisan kon sa international court pa mokiha ang mga militanteng grupo di gihapon sila paminawon didto.
Ang lokal nga mananagat maoy may katungod nga mopalanog sa ilang sentimento ug dili kay ang mga grupo sa militanteng tawo dili taga Pinamungajan ug Aloguinsan, matud pa ni Yapha, human mabati ang bahad sa mga militante nga mopasaka'g kiha batok sa gobyerno kon ipadayon ang oil exploration.
Matud pa ni Yapha nga ang proyekto karong sunod tuig nga himuon sa Japan Petroleum Exploration Inc. (JAPEX) anha mahimutang sa kadagatan sa Pinamungajan ug Aloguinsan.
Gani sumala pa ni Regional Director Antonio Labios, sa Department of Energy (DOE-7) nga may usa ug tunga ka kilometro ang "radius" niini nga dili kaayo halayo sa baybayon sa maong mga lungsod.
Midugang si Labios nga dili kaayo madisturbo ang mga isda niini kay mogamit man ang Japex og modernong kahimanan, busa dili kaayo maapiktahan ang pagpanagat sa mga mananagat.