5 Cebuanang OFW gi-GRO sa Malaysia tabangan

Tabangan sa kagamhanan sa siyudad sa Sugbo ang lima ka mga Sugboanon OFW workers nga nabiktima sa illegal recruitment ug mi-eskapo sa ilang mga amo nga mipa trabaho nila isip mga guest relation officer (GRO) didto sa nasud sa Malaysia.

Atol sa press conference kagahapon sa udto personal gyud nga gitawagan ni Mayor Tomas Osmeña sa cellular phone si Ambassador Victoriano Lecaros sa Malaysia nga paningkamotan nga maasikaso ang pagpapauli og balik sa mga Sugboanong OFW nga nabiktima sa illegal recruitment sa maong lugar.

Ang maong mga OFW nga gi-recruit dinhi sa dakbayan niadtong miaging bulan gipatuo nga patrabahoon isip singer didto sa maong nasud apan pag-abot nila sa lugar gihimo silang mga GRO ug mo-abi abi sa mga kustomer nga lalaki.

Ang mga biktima naila sa mga pangalan nga sila si Grace Gabatu, Michelle Redelusa, Cheryl Trucio, Rona Adrian Bless Pangga ug Precious Adel Hermias.

Ang maong mga biktima nga naka-eskapo sa ilang mga amo kasamtangan karong nagtago-tago sa siyudad sa Miri, Malaysia nga nahimutang sa isla sa Sabah.

Tungod niini, si Osmeña nipasalig nga motabang kutob sa mahimo og usa na niini ang posibleng paghatag og libre nga pletehan sa eroplano pagbalik nila dinhi sa nasud.

Ang iyaan sa usa sa mga biktima nga si Precious maoy boluntaryong misumbong sa maong gidangatan sa mga OFW ngadto sa komentaristang si Bobby Nalzaro aron matabangan ang mga biktima nga makapauli balik dinhi sa Sugbo human gipangita karon sa Malaysia ang mga biktima human midangop ang ilang mga employer sa mga otoridad sa maong nasud.