Nagdala'g patay'ng iro gipangsikop

Nadakpan sa kapolisan sa Basak Police Station sa Mandaue ang tulo ka tawo kinsa nagdala og patay nga iro nga gikabalak-ang isagol sa karne sa kanding.

Ang pagdakop natigayon nila ni SPO1 Edgar Pasaylo sa kapolisan sa Presinto 3 sa Basak Police Station dihang ang tulo ilang nasigpatan nga nagdala og sako nga nagkadugo kagahapon sa buntag.

Ang mga nadakpan mao sila si Carlito Medillo, 20, ulitawo, Jose Moron, 34, minyo ug ilang kauban ang minor de edad nga lalaki.

Sa imbestigasyon ni SPO1 Pasaylo maoy iyang nahibaw-an nga ang duha ka patay nga iro gisulod sa duha usab ka sako nga gidala sa maong tulo ka tawo.

Matud pa niya nga unang nakamatikod niini sa Basak Barangay Konsehal Felipe Diano kinsa nangayog panabang sa pagdakop sa mga suspetsado ngadto kanila.

Dugang pa ni SPO1 Pasaylo ang mga suspetsado nga ilang gisukitsuklit hugtanong mihimakak nga ilang ibaligya sa merkado sa Mandaue ang maong karne sa mga iro..

Gipasabot sa mga dinakpan nga ilang himuong pulotan ang karne nga ilang nadakpan nga ilang gituohang walay mga tag-iya sanglit gipasagdan man kining maglatagaw ug manguykoy sa mga basura.

Si SPO1 Pasaylo miingon nga kalapasan sa Animal Welfare Act ang ilang ipasaka sa tulo ka dinakpan gawas lamang kun pasayloan kini sa mga tag-iya sa gipamatay nga mga hayopan.