Pasko wagtangon?

Gikahibulong ni Msgr. Achilles Dakay, tigpamaba sa Sugbo sa awhag sa Vatican nga ipawagtang na ang Pasko, apan mipasidaan sa mga Katoliko Romano nga dili dayon angayang motuo niini.

Naukay ang mga tawo sa Uropa tungod niining maong taho.

Matud pa ni Dakay nga iya pang klarohon kining tanan kun maabot na ang kopya sa L'Osservatore Romano opisyal nga pamantalaan sa Vatican nga maoy nagpublikar ning maong balita, karong semanaha.

Sa kahikurat ni Dakay sa maong balita, nakapangutana siya kun unsay buot ipasabot niini sa Vatican sanglit kay kon ibutang nga naglabad ang ulo sa tawo, putlon ba diay ang liog aron mawagtang ang ulo nga naglabad.

Sama ra matud pa niya nga kon ang katarungan sa Vatican mao nga ipawagtang ang Pasko tungod kay gihimo na kining negosyo sa kadaghanan, ug nawagtang ang tinuod nga diwa sa Pasko, "ang Pasko ba diay wagtangon nga ang pagnegosyo man kaha niini maoy nakapahanaw sa iyang diwa."

Apan di lang kay si Dakay ray nahaigking ning maong balita kay hasta ang taga Poland, nakaingon nga kining gibalita sa Vatican pinaagi sa iyang opisyal nga pamantalaan, L'Osservatore Romano usa ka "unworthy joke".

Hinuon matud pa sa Vatican nga kini maoy hagit sa mga Katoliko Romano nga mobalik na pagtamod sa kabililhon sa Pasko sa tinuod nga doktrina nga gipatuman sa iyang mga kadagkoan sa simbahan nga mao ang Sto Papa, sukad pa kaniadto.

Kun si Santo Papa Benedict XVI karon lain na og baruganan kay nasabtan niyang panglingawlingaw ug pangnegosyo nalang sa tawo ang Pasko, ang hunahunaon sa tanan kun angay bang wagtangon sa hingpit ang Pasko, matud ni Dakay.