Tomas 'supak' sa secret marshals

Gisupak ni Mayor Tomas Osmeña ang lakang sa kapolisan nga nagtinguha sa pagpatuman sa mga secret marshals diha sa mga public utility vehicles ilabi na sa puj nga gitumong aron pagsumpo sa mga nitumaw nga sunodsunod nga pagpanulis dinhi sa dakbayan ning milabay'ng mga adlaw.

Atol sa press conference kagahapon sa buntag mipadayag og kabalaka si Osmeña sa posibilidad nga pagsaka sa mga pagpanulis og bangko dinhi sa dakbayan kun subling ikapatuman ang secret marshals.

Gibasehan sa mayor ang wala ka abot og usa ka libo ka mga polis dinhi sa dakbayan kun itandi sa subra sa usa ka libo ka mga Puj ug kun mahinayon ang maong plano mahurot ang tanang mga polis bisan kadtong gipakatap sa kadalanan tungod kay pasakyon naman kini sa mga sakyanan nga magsibilyan aron mamonitor ang mga tulisan.

Giklaro sa mayor nga mosuporta siya sa pagpabarug og balik sa secret marshals kun pilion lang ang rota nga makonsiderar nga crime prone areas aron mao kini butangan og mga polis nga pasakyon sa puj nga magsibilyan.

Si Bise Mayor Micheal Rama, tsirman sa Police Coordinating and Advisory Council (PCAC), mipadayag na og pag-uyon sa pagbanhaw og balik sa secret marshals sa labing daling panahon.

Si Police Regional Office (PRO-7) Director Chief Supt. Silverio Alarcio maoy miluwat og direktiba sa hepe sa kapolisan nga nagmando sa pagpabarug og balik sa secret marshals aron masumpo ang mga pagpanulis sa mga pasahero sa puj.