Matud pa ni Cebu Customs District Collector Ricardo "Boysie" Belmonte gumikan sa mga importers ug exporters ilang nakita ang kalampusan sa ilang koleksiyon diin mitaas og 30 porsiyento kun itandi sa milabay'ng tuig 2005 sa katapusang unom ka bulan.
Si Belmonte miangkon nga posibleng dili nila makuha ang tinuig nga target nga P5.2 bilyones niining tuiga nga gidestino sa Department of Finance. Apan iyang nakita nga sugod sa iyang paglingkod niadtong Hulyo adunay "steady increase" sa koleksiyon kun itandi sa mga bulan sa 2005 sa panahon ni kanhi Cebu Collector Ma. Lourdes Mangaoang.
Gumikan niini, mapasalamaton gihapon si Belmonte sa mga paningkamot sa iyang mga empleyado sa BOC-Cebu ilabi na sa mga importers ug exporters nga usa sa mga hinungdan sa pagsulbong sa ilang koleksiyon.
Sa 44 ka mga top importers ug exporters sa BOC District Office, ang top 3 importers mao ang Norkis Trading Group of Co., Energizer Phils. Inc. ug Taiheyo Cement Corp. samtang ang Top 3 exporters mao ang Shemberg Marketing Corp., Profoods International. Corp. ug Marine Colloids Phils.
Sa Subport of Mactan, ang top 3 importers mao ang Taiyo Yuden, Lear Automotive ug Timex Phils Inc. samtang ang top 3 exporters mao ang Pentax Phils., Cebu Mitsumi ug Lexmark International.
Sa Subport of Dumaguete, ang top importers mao ang Dumaguete Coconut Mills ug Orica Nitrates Phils. Inc. ang top exporters mao ang Lazi Bay Resources ug ang Orica Nitrates Phils. Inc. nga gidumala ang brokerage ni Bensing Raguindin.
Gipanghinaot ni Belmonte nga sa sunod tuig 2007 padayon gihapon ang ilang suporta sa buhatan sa BOC-Cebu.