Polis mopabuto sa pasko, bag-ong tuig taktakon

Taktakon gyud sa serbisyo ang bisan kinsang polis nga mamatud-ang mopabuto og armas atol sa kapaskuhan sumala pa sa labing taas nga opisyal sa kapolisan sa rehiyon.

Nunot niini, pabutangan og tape ang mga sumbohan sa armas sa tanang polis dinhi sa rehiyon aron kalikayan nga dili gamiton sa mga polis ang armas sa gobiyerno sa ilang pagpabuto.

Si Police Regional Office 7 Director Silverio Alarcio,Jr. mitug-an sa mga tigbalita kagahapon nga karong semanaha mopagawas siya og kamanduan sa tanang mga polis sa pagbutang na og mga tape.

Matud pang Alarcio tradisyon na sa PNP ang maong pamaagi matag kapaskuhan kini aron masigurong dili kini gamiton sa binuang ilabi na atol nga naglipay-lipay ang katawhan.

"Tradisyon na natin iyan, it is already part of our SOP sa PNP taun-taon kaya gagawin natin dito yan," asoy pang Alarcio.

Samtang gipasalig ni Alarcio nga di maapektahan sa maong kamandoan ang responsibilidad sa mga polis bisan gibutangan og tape ang ilang sumbohan.Gamiton lang ang ilang armas kung gikinahanglan.

Giawhag ni Alarcio ang publiko sa pagsumbong kung duna silay makit-ang mga polis nga mopabuto og armas atol sa Pasko ug sa Bag-ong tuig.

Sumala pang Alarcio ang pagbuto og armas nga walay hinundang sa mga sakop sa kapolisan mahimong silutan og pagkataktak sa serbisyo.

Samtang gipasalig ni Alarcio nga bisan paman sa pagtugot nga makabakasyon ang pipila sa ilang mga polis niining mga panahuna dili gihapon mabalda ang serbisyong ilang gihatag sa publiko ilabi na sa mga negosyanteng nabalaka tungod sa pagsiaw na usab sa mga pagpanulis dinhi sa Sugbo.

"We have not actually relax our security operation, our policemen can still be seen on the ground," asoy pang Alarcio.

Kagahapon sa buntag, si Cebu City Police Office acting director, Supt. Melvin Gayotin mimando na sa mga polis nga naapil sa Christmas break sa pagbutang og tape sa ilang mga armas.