Mga empleyado sa dept store nanguha'g baligya nangasikop

Mga empleyado sa dakong department store sa Lapulapu nga gipasanginlang mangunay og panguha sa mga baligya nasakpan nga nanguha sa mga baligya sa maong tindahan uban sa ilang mga kunsabo sa milabay'ng adlaw.

Ang nasikop mao si Brian Igloria, 22, taga Ibo, Lapulapu uban nila ni Rodel Barrientos, 23, lumad sa Gun-ob, Lapulapu; Refan Laput, 22, taga Villagonzalo I, dakbayan sa Sugbo; Lemuel Fernandez, 18, sa Sangi, Pajo, Lapulapu, pulos mga ulitawo ug empleyado sa Gaisano Mactan nga nadestino sa sporting goods.

Uban sa gisikop ang janitor nga Rey Mahilom, 23, empleyado sa Able Services, ug ang duha ka kunsabo nga sila si Edward Gonzales, 22, ug Giovanni Gilig, 21, mga ulitawo ug nagpuyo sa Sta. Rosa, Isla sa Olango.

Base sa imbestigasyon ni SPO1 Rodito Viovicente sa Theft and Robbery Section Lapulapu City Police Office nga sa milabay'ng adlaw, si Edward Saberon, ang guard on duty sa maong tindahan mitawag sa TRS ug sa dihang miresponde kini nataymingan ang ubay-ubay sa mga mahalong baligya sa paugnat sa kusog ang nawagtang lakip na ang uban pang produkto nga giingong gikuha sa mga suspetsado.

Base sa pamahayag sa mga empleyado sa maong tindahan nga ang modus operandi sa mga suspetsado mao ang pagbaylo sa mga price tags ug bar code sa maong mga produkto human kini mapanso sa cashiers booth ug si Mahilom ang modala sa maong mga stocks ngadto nila ni Gonzales ug Gilig nga kunohay mga buyer sa maong mga produkto.

Gumikan niini, gitagsa-tagsa sa TRS ang pagrecover sa maong mga gamit ug nakuha ang mga kinawat sa mga panimalay sa mga suspetsado human kini nila gibahinbahin ug gisikop ang tanan hinungdan sa ilang pagkadetiner sa Lapulapu Police Station.

Matud pa ni Viovicente nga ang nakuha sa mga suspetsado naglangkob sa mga lainlaing sporting goods sama sa mga bola, gloves, rambo type nga kutsilyo, gitara, foams ug uban pang mga baligya sa maong tindahan.

Dugang pa ni Viovicente nga posibleng dugay na kining gihimo sa maong mga empleyado uban sa ilang mga kakunsabo sa operasyon apan karon lang kini mamatikdi sa nagdumala sa maong sporting goods section.

Bisan pa nga wala pa makwenta sa tag-iya sa Gaisano Mactan ang kantidad sa mga gikawat nga butang apan segurado silang mopasaka og kaso ang management sa maong department store.