TF summit commander bag-o na

Duna nay bag-ong pangulo isip "over-all" Security Task Force Commander alang sa Asean Summit human gikatakdang moretiro si PNP Deputy Director for Operations and Plans Director Isidro Lapeña karong Enero 2 sa sunod tuig.

Ang bag-ong pangulo nga si direktor Antonio Billones kinsa mao usab karon ang Chief Directorial Staff sa kapolisan mipahigayon kagahapon og command conference uban sa mga Summit Task Group Commanders diha sa bodega sa Uniwide.

Si Billones sa pakighinabi sa mga tigbalita miingon nga mao gihapon ang sistema sa pagpangandam nga iyang ipatuman subay sa giandam na nila ni Lapeña ug PRO7 director, Chief Supt. Silverio Alarcio,Jr. apan duna ray gamay'ng kausaban sanglit solusyunan nila ang mga problemang nakit-an niadtong milabayng mga dry-runs.

"Kung ano yung na-prepare nila ni Gen.Lapeña at Alarcio yun din ang ipapatupad natin although merong mga pagkukulang natin noon, yun ang aayusin natin,"asoy pang Billones.

Si Billones midugang nga posibleng dunay mga realignment sa mga polis ug mga tropang nagbantay karon sanglit dunay wala nay mga bantayanan karong Enero nga pwedeng gamiton sa ubang dapit.

Samtang gipakagamay ra ni Billones ang kabahin sa terorismong mohamok sa maong kalihukan sanglit wala sila makadawat og kongkretong indikasyon nga duna gyuy galihok nga terorista para molusad sa pag-atake.

"We are planning based on the worst case scenario, no specific threat tayong natatanggap," asoy pa sa niini.

Gipakagamay sad sa heneral ang mga advisory nga gipagawas sa ubang nasud kabahin sa hulga dinhi atol sa summit sanglit kaniadto pa gihimo na kini kanunay sa maong mga nasud.