Duha natigbasan diha sa 'Lapu

Duha ka tawo ang naangol human mabiktima sa pagpanigbas sa miaging gabii sa managkalahing takna ug dapit sa dakbayan sa Lapulapu nga naglakip sa biktima ang usa ka negosyante.

Si PO3 William Humoc sa Homicide Section sa Lapu-Lapu miila sa mga biktima nga si Inting, 50, minyo ug negosyante sa sitio Sudtonggan, barangay Basak ug Arvin Bering, 25 anyos nga taga sitio Timpolok sa barangay Babag sa maong dakbayan.

Ang suspetsado nga nakatigbas kang Inting mao ang iyang bayaw nga si Paulino Casinillo, nga igsuon sa iyang asawa ug nagpuyo sa maong dapit.

Si PO3 Humoc miila sa suspetsado nga nakatigbas kang Bering nga mao si Juan Tutor, hingkod ang panuigon nga silingan usab sa maong dapit niini.

Dugang pa ni PO3 Humoc nga ang biktima nga si Inting igo lamang unta nga mibadlong ni Casillo apan gitigbas na hinuon ang ulo ug suwerte lang kay nakahupo ug natapsingan sa sundang.

Nadakpan ang suspetsado human mailog ang sundang ug gitanggong kini sa sulod sa bilanggoan sa kapolisan.

Si PO3 Humoc miingon nga ang laing biktima nga si Bering gitigbas usab sa suspetsado nga si Tutor kinsa nagpabilin pang gawasnon human kini makasibat pahilayo.