'Pasko sa karaang Parian' ilusad

Sa ikaduhang higayon aron masubli ang sadya nga kapaskuhan dinhi sa Sugbo ilusad pagbalik ang "Pasko sa Karaang Parian" diin sugdan pinaagi sa prosisyon sa 'Three Kings and Shepherds padulong sa Cebu Metropolitan Cathedral.

Ang prosisyon magsugod sayo sa kaadlawon sa ika-siyam nga adlaw sa Misa de Gallo nga nagsugod na niadtong Sabado.

Ang mga kamelyo gikan sa barangay Tinago ug ang mga magbalantay sa mga karnero ug ilang mga karnero gikan sa Parian ug magsugod sa prosisyon alas 4 sa kaadlawon diha sa eskina sa Mabini ug Lopez Jaena diha sa atubangan sa labing karaang ancestral house sa Sugbo nga iya sa pamilyang Yap-Sandiego.

Ang inilang choreographer nga si Val Sandiego nga maoy unang mibuhi sa maong kinaraang pasko diha sa Parian niadtong 2005 nagkanayon nga gikan sa ilang abutangan molahos ang prosisyon ngadto sa simbahan dinuyugan sa mga sikat nga kantang pamasko nga Binisaya.

Matud pang Sandiego kini maoy paghinumdom sa pagpangita sa "Tulo ka Hari" nga gigiyahan lang sa kahayag gikan sa usa ka bituon padulong sa pasongan diin maghigda ang Batang Hesus.

Ang prosisyon nga ubanan sa mga kabataan diin ang mga kamelyo, ang Tulo ka Hari ginama sa papel nga gipintalan ug giadornohan og maayo.

Tuyo sa mga nag-organisa niini mao ang pagtanom sa alimpatakan sa kabataan og kasadya sa kapaskuhan.

Human sa prosisyon, sama sa kinaraang prosisyon nga tapuson sa "painit," dunay himuong "painit" ang mga organizers sa maong adlaw diha sa atubangan sa Cebu Heritage Monument diin ang kabataan maoy pakan-on aron pagpadayag sa maayong gawi panahon sa pasko.

Ang maong kalihukan suportado nila ni Tinago barangay Kapitan Joel Garganera ug Parian barangay kapitan William Balaga ug mga opisyales ug mga residente.