Gitigbas sa liog, tiyan patay

Patay nang napalgan ang usa ka 36 anyos nga lalaki nga may daghang tinigbasan sa liog ug tiyan atubangan sa usa ka simbahan sa sitio Bahak sa Poblacion sa lungsod sa Liloan kagahapon.

Usa ka Conan Ayuda ang midangop sa buhatan sa Liloan police station ug mipahibalo kabahin sa tawong nagkadugo nga ilang nakit-an diha sa atubangan sa simbahan sa mga Mormon sa maong dapit.

Sila si PO3 Ricardo Enriquez kinsa maoy miresponde sa maong report miila sa biktima nga si Alejandro Ayuda, residente sa maong barangay ug kabanay ni Conan.

Nasuta sa imbestigasyon nga una pa makit-ing patay ang biktima dunay nakakita kaniyang naglakaw pauli gikan sa usa ka baylihan uban ang duha ka wala mailhing mga lalaki.

Sumala pa sa mga polis, gitigbas ang biktima diha sa liog ug sa tiyan nga maoy nakaingon sa hinanali niining kamatayon.

Si SPO2 Rizalino Aligno mitug-an sa mga tigbalita kagahapon nga wala pa gihapon mailhi kung si kinsa ang mipatay sa biktima ug padayon pa ang ilang pagsiksik og dugang impormasyon aron matino ang motibo ug mapasakaan og kaso ang mihimo niini.