Libro ni Gullas subling ilusad

Subling ilusad ni Dr. Jose "Dodong" Gullas, ang vice president sa University of the Visayas, ang dugay na niyang damgo ug obsesyon nga librong "The Art of Living Well" nga sinuwat pa sa iyang amahang si Don Vicente Gullas karong Enero 12, 2007 atol sa adlaw'ng natawhan sa tagsulat.

Ang maong libro nga dunay 176 ka pahinang naghisgut sa pamaagi ug mga ideya kun unsaon mamahimong malampuson sa kinabuhi ang usa ka tawo pinaagi sa positibong panglantaw ug hustong pamatasan bunga usab sa determinasyon ug kaugalingong sakripisyo.

Duna kini 17 ka mga tsapter diin ang tanang mga panapos nga mga pulong tapuson sa usa ka pangutana, kini gituyo sa author aron makuha ang atensyon sa mga magbabasa sa pagpamalandong, ang tubag niini mahisgutan ra sa mosunod nga mga panid.

Si Sir Dodong, kinsa nahimo nang usa sa mga inilang haligi dili lang sa politika ug katilingban kundili pinaagi sa iyang serbisyo sa publikasyon dihang iyang gibuhi og balik ang The Freeman niadtong 1965, nagkanayon nga ang maong libro gitagana aron himuong pagtulun-an sa mga tinun-an sa ikaupat nga tuig sa high school ug sa mga tinun-an sa College of Arts and Sciences.

Diha sa maong libro nasulat usab ang mga estorya sa mga inilang mga personahe sa kasaysayan gawas pa sa kang Don Vicente. Ang tagsulat sa maong libro mipaabot sa mensahe ngadto sa mga makabasa niini kung unsa ka bililhon ang kinabuhi sa tawo ug ang kalampusan naa ra sa mosunod nga tikang bisan unsa pa mang estado ka sa kinabuhi nabutang.

Matud pang Sir Dodong, imbitahon sa ilang pamilya ang Presidente ug Chief Executive Officer sa ABS-CBN nga si Eugenio "Gabby" Lopez isip pinasidunggang dinapit ug mamahayag kabahin sa maong libro karong Enero 12, 2007.