Titser mihimakak sa mga pasangil

Gipanghimakak sa gireklamong magtutudlo ang tanang pasangil batok kaniya sa Parent Teacher's Community Association sa Balirong National Hi-School.

Si Marlene Secusana , magtutudlo sa Balirong National High School mituyo og bisita sa Banat News aron sa pagtubag sa pasangil nga siya nagpabayad taas sa test paper, wala pag-remit sa kuwarta sa miscellaneuos ngadto sa ilang school treasurer ug ang pagpadisko ug uban pang reklamo.

Matud niya bakak ang tanan sanglit na-remit niya ang tanang kwarta ngadto sa treasurera apan wala kini malakip audit sa miaging tuig.

Samtang ang kabahin sa miscellaneous nga kwarta iya rang gihipos.

Miangkon sad siyang nagpadisko siya niadtong Oktobre 15 niining tuiga sulod sa classroom tungod sa pagtugot sa ilang guidance councilor nga si Jovina Trocio.

Nagduda si Secusana nga gikontrahan siya sa PTCA human ang pag-umangkon ni Florante Manayon ang presidente sa PTCA kinsa usa usab ka magtutudlo maoy leader sa pikas grupo.

"Duna man gud mi faction-faction diha tali namong mga maestra mao nang gikontrahan ko kay ang presidente sa PTCA dunay pag-umangkon nga maestra," asoy pang Secusana.

Samtang kabahin sa raffle, matud pa niya nga nahinayon gyud kini niadtong tunga-tunga sa Nobiyembre.

Iyang gikuwestyon ang PTCA nganong wala makakita sa gihimo sa pikas grupo sa magtutudlo nga nagparaffle usab og makaduha ka higayon.

Samtang ang test paper si Secusana miingon nga molapas gyud sa P2 ang bayranan sa mga tinun-an tungod kay kausa lang siya mohimog eksaminasyon ug tag-as kaayo, dugang pa niya dili lang siya maoy nangayo sobra sa P2 kun dili ang ubang magtutudlo.

Kun kahinumduman si Secusana gireklamo sa mga ginikanan sa Balirong National High School ug napatik na dinhi ning mantalaan pipila na ka adlaw.